Kyun aankh jhuka li maine

Kyun aankh jhuka li maine

Mujhse mat pooch ki kyun aankh jhuka li maine,
teri tasveer thi jo tujhse chupa li maine,

jis pe likha tha ki tu meri muqaddar mein nahi,
apne maathe ki woh tehreer mita li maine,

har janm sabko yahaan sachha pyaar kahaan milta hai,
teri chaahat me to umar bita li maine,

mujhko jaane kahaan ehsaas mere le jaayein,
waqt ke haathon se ek nazm utha li maine,

gherey rehti hai mujhe ek anokhi khushabu,
teri yaadon se har ek saans saja li maine,

jiske sheron ko woh sunkey bahut roya tha,
bas wohi ek ghazal sabsey chupa li maine…